Sergio de la Ossa - Profesor de Guitarra


 

Naceu en Madrid en 1978, e vive desde 1982 en Compostela, onde realiza estudos de Mestre de Educación Musical (USC, 1996-1999) e de guitarra clásica. Impartiu entre 2011 e 2015 a materia de Música Tradicional no Instituto Kodály da Academia Liszt (Kecskemét, Hungría), centro onde completara o Mestrado en Pedagoxía Musical Kodály no 2010. No 2015 retoma os estudos de guitarra clásica no Conservatorio Superior da Coruña.

Recibe consellos sobre transcrición e catalogación de músicas tradicionais de parte das etnomusicólogas Mária Domokos e Olga Szalay, do Instituto de Musicoloxía (ZTI) da Academia Húngara das Ciencias, Budapest. Traballa desde 2007 na transcrición, edición e arquivo do material musical pertencente ao Arquivo do Patrimonio Oral da Identidade (APOI) do Museo do Pobo Galego (www.apoi.museodopobo.gal), onde ten publicadas perto de 200 partituras de música tradicional, análises das pezas e guías de uso.

Exerceu como mestre de solfexo, guitarra clásica e harmonía en varios centros, e tamén impartiu cursos e conferencias sobre música tradicional, baile, xogos e a adaptación do Método Kodály. Ofreceu a única conferencia sobre temática galega na edición do 2014 do WOMEX en Santiago de Compostela.

É co-autor do libro de baile tradicional galego Así fan os bailadores… (Baiona: Dos Acordes, 2009). Colaborou na monografía sobre o violinista Florencio, cego dos Vilares (a Central Folque, 2015) e é autor do estudo musical no Repente galego, de Ramon Pinheiro Almuinha (2016).  Traduciu do húngaro ao galego, xunto con Veronika Gergely, as novelas Oito minutos, de P. Farkas, e Ao norte unha montaña…, de L. Krasznahorkai, e está en preparación Cotovía, de Dezső Kosztolányi, todas elas para Rinoceronte Editora.

Participou en concertos de diversos estilos e ofreceu recitais coa guitarra; acompañou as aulas de Euritmia que impartiu en Galicia Gloria López. Estudou contrapunto co compositor Gábor Kósa e compón arranxos principalmente para a guitarra. Na actualidade toca o koboz e leva con Veronika Gergely o conxunto Gergelyes, que fai música e baile dos húngaros de Moldavia.

 

© 2018 berenguelamusica.com - Todolos dereitos reservados