Nace en Bilbao. Estuda cos profesores Juan Tarín, Michael Winfield, John Anderson e Stefan Schilli. No ano 1991 obtén o Titulo Profesional de oboé (Premio de Honor) e tres anos máis tarde o Título Superior no Conservatorio “Juan Crisóstomo Arriaga” de Bilbao. Posteriormente estuda 4 anos no Royal College of Music de Londres, obtendo o Diploma BMus e o Diploma Teacher RCM.

Ao terminar os seus estudos en Londres participa nun curso orquestal de tres meses de duración na Toho Gakuen Orchestra Academy (Xapón). No 1999 foi seleccionada para a “Orquestra da Académie Européene de Musique" do Festival Internacional de Arte Lírica de Aix-en-Provence.

Asiste a numerosos cursos de perfeccionamento con profesores tales como E. Abbuhl, E. Marsden, E. Martínez, F. Leleux, C. Wetzel, S. Schilli, D. Jonas, T. Indermühle...

Colaborou con varias orquestras españolas tales como Orquestra Sinfónica de Galicia, Orquestra Cidade de Granada, Orquestra Sinfónica de Madrid, Orquestra Sinfónica de Euskadi, Orquestra Sinfónica do Principado de Asturias e Orquestra Sinfónica de Bilbao, coa que interpretou o Concerto para oboé & orquestra, de R. Strauss e o Concerto para oboé & orquestra en Do Mayor Kv 314 de W. A. Mozart. Así mesmo foi Oboé Co-principal da Orquestra Pablo Sarasate de Pamplona.

Na actualidade é Oboé Co-principal da Real Filharmonía de Galicia, desde Marzo do ano 2000, exercendo o posto de Oboé principal durante a tempada 2005–2006 e parte da tempada 2006–2007, na que interpretou o Concerto para oboé e orquestra Kv 314 de W. A. Mozart.